2月13日，天晴，氣溫和暖，冬天幾乎已悄然離去，迎嚟回南天氣。美國國會就避晚政府再陷入停擺達成協議，同意撥款13.75億美元用作修建邊境圍欄，雖然呢條數跟侵侵要求修建圍牆嘅55億美元撥款差咗幾條街，當然侵侵唔多高興，但至少可避免美國政府再陷入停擺，對美股嚟講當然係好消息。

　　除咗呢個好消息，亞馬遜收購家居無線網絡路由器開發商，股價全日升近3%。而運動品牌Under Armour扭虧為盈，勝於預期，股價亦扭轉跌勢，全日升近7%。美股三大指數升逾1%，而標指更已升穿250日線，之前唔少專家都擔心，標指一直未能重返牛熊分界線之上，呢一輪美股升勢曇花一現後，或再次迎來新一波向下震盪。家下標指已成功重返250日線之上，只要隨後幾個交易日能靠穩其上，美股呢隻老牛或再重新注入活力。

　　不過美匯指數喺聯儲局放鴿後，只係腳軟咗一下之後，近日竟然有回勇跡象，美元更連升8日，跟金價同步向上，呢個情況有啲唔尋常，尤其對歐元表現更為強勁，歐元已連跌6日，反映資金再次撤出歐洲轉為流入美國。米字旗國脫歐未明朗化，加上歐洲官方亦下調增長預測，睇嚟歐洲經濟前景真係愈嚟愈暗淡。

　　只係近日中美貿易談判進展似乎甚為理想，威脅全球經濟有機會拆走一個計時炸彈，只要米字旗國能避過無協議脫歐，即使中國經濟仍有機會硬著陸，亦未必引發另一場金融海嘯級嘅經濟災難。反而更為擔心係各國債務水平持續攀升，一旦有乜冬瓜豆腐，定會對全球金融體系帶嚟巨大衝擊，呢個亦係黃金價格持續上升嘅原因。

　　但上述情況一日未發生，各地魚缸鑊剷派對繼續，音樂一日未停，遊戲就繼續玩落去，選擇一直靠邊站，定話且戰且走，小心翼翼地參力派對，答案似乎相當明顯。若然上月缸邊友畀首個交易日跌勢所嚇親，一直唔敢入場，甚至反向操作做淡友，錯過超過3000點升幅之餘，更被挾到嘔白泡。期內大戶殺熊未停過，但牛熊證街貨卻一直失衡側埋一邊，可見市場上確係有唔少死硬派淡友。

　　隔晚美股強勢，造就今日港股再重返28200水平，並順手屠殺埋28200至28299呢一區域嘅熊證。雖然騰訊(00700) 股價上到350元已有啲拉牛上樹感覺，要再下一城突破361元250日線嘅阻力區唔容易，呢隻火車頭似乎真係要靠邊站一站。反而另一魚缸指標港交所(00388) 得到大行祝福，指其將受惠更多資金流入中國市場，收入或會出現結構性增長，而相關利好因素並未反映，故將其目標價由290元大幅調高至340元，建議增持。噚日其股價一舉上破250日線240.9元，勁升逾4%報收252元，預期升勢有餘未盡，暫時短線目標先睇280元，跌穿10日線243.6元止蝕。

　　

　　(徐狄怡，證監會持牌人，大錦證券有限公司董事)