港股重上三萬，同時間樓價指數連升8周，之前已提出最影響樓價的正是股市升跌，如今樓市隨股市極速反彈，錯失上車機會的又要等運到。

有人歡喜有人愁，有股樓揸手的上市公司，成為今浪大贏家，低調股彩星集團（635）乃當中的代表。彩星集團個仔彩星玩具（869）出名產銷忍者龜玩具，彩星集團則主攻磚頭同埋股票。旗艦物業乃尖沙咀廣東道的彩星集團大廈，正宗自由行心臟地帶，兼食正高鐵開通；住宅物業投資則座落半山麥當勞道，物以罕為貴也；位於屯門的彩星工業大廈，則有望受惠政府的活化措施。事實上，集團最新投資物業升值達3.3億元，未來只會繼續水漲船高。

另一方面，集團截至去年底手持逾7,000萬元市值港股，包括新地（016）、九倉置業（1997）、恒地（012）等，地產股今年升到啪啪聲，集團投資收益又係坐定粒六。

集團上月底連續兩日大成交，原來係回購盤作怪，回購價1.05元，總數接近7,000萬股，相當於總股本3.3%，非常大手筆。睇真啲，每股NAV高達3.1元，以現價1.18元計，等於四折大平賣，仲要有12厘息墊底（撇除特別息也近4厘），呢浪估值爆發潮有排玩了。

蘋果日報