5G只不過係網速比4G快，點解5G會被各個行業甚至國家高度重視?

原因在於現時無人駕駛，無人商店，智能家居，遠程醫療等等技術已遂漸成熟，欠缺既就係網絡傳輸速度，網速慢，令數據同訊息一來一回已有延遲，令機器或系統唔能夠即時作出反應，而5G正正係當中縮短傳輸時間既橋樑。

將來既智慧城市，大數據，人工智能，雲計算都必需依靠傳速快既5G。所以5G潛在客戶會比4G多，除左有對遊戲要求較高既手機客外，亦會吸引到對即時安全系統，遠程監察檢查與控制既新企業客戶。換言之，小至一輛無人駕駛車，大至工業生產線或軍事設施既數據都經由5G網絡傳送，若果被入侵或惡意更改，後果都難以預計。

講返5G概念電訊股，我比較睇好香港本地電訊股，因為香港地方細，非常適合5G發展。5G網速雖然比4G快超過10倍，但高頻5G缺點在於覆蓋範圍細，而香港地方細有利5G發展，發射信號既基站位置可以更緊密，傳送數據更加快同可靠。

另一個因素係基站數量，地方細但只得幾個基站都唔成事。事實上，政府已經規定電訊商競投得到5G頻譜後需要起獲指配頻譜後5年內興建5,000個基站。以過往香港大約有4至5個電訊商競投4G頻譜估計，整個香港將擁有超過2萬個5G訊號發射基站，相信覆蓋率會相當足夠。

另外，香港屬於自由市場，比其他地方既政策相對穩定，政策風險較低，起回報上比較有保證，至起碼唔會有突如其來既政策限制行業發展。